طريقة عمل مكرونة بالفراخ والمشروم
- الكمية تكفي: 4 أشخاص
- وقت التحضير: 30 دقيقة
- وقت الطهي: 30 دقيقة
عناصر المحتوى
المقادير:
- بصل
- فلفل أخضر أو ألوان
- مشروم
- مكرونة أى نوع تحبية
- صدر فرخة
- ودقيق
- لبن
- وملح
- وفلفل
- ومادة دهنية للطبخ
التحضير: طريقة عمل مكرونة بالفراخ والمشروم
- أقطع البصل والفلفل والمشروم والفراخ زى الصور
- مكنش عندى فلفل الوان للاسف
- بس لو عندك هيدى شكل اظرف وكمان هتكون أفيد
- قلى البصل فى شوية سمن او زيت خفيف
- بحط عليه ملح عشان ينزل مايته ويدبل وميتحرقش
- ولما يدبل أضيف الفلفل ولما يدبل أضيف الفراخ وأعلى النار عشان متنزلش ماية كتير وأقلب كل شوية
الطبخ: طريقة عمل مكرونة بالفراخ والمشروم
- أحط الملح والفلفل للفراخ وبنوصل للشكل ده وعلى فكرة دى كده طريقة حلوة للفراخ لو حبيتى مع رز
- مثلا بس زودى عليها سوا شوية لحد ما لونها يغمق سنة
- ضفت المشروم المقطع بس الصورة كانت مشبرة خالص محبتش احطها المهم نقلت الحاجات كلها فى
- حلة لان المشروم بياخد مكان فالاول وبعدين بيدبل ويخس خالص ودى المكرونة سلقتها انا بحب
- الفيونكة الصغيرة والصدف أكتر حاجة
- نيجى بأة للصوص الابيض ده
- والله انا معرفش اذا ده هو هو البشاميل وللا لأ ياريت اللى عندها خبرة تقولى بس أنا بئالى فترة بعمله
- مع كذا حاجة ومعرفش عرفت الطريقة منين
- بس عقلى الباطن شغال الله ينور
- بحط سمن او زيت اللى تحبيه
- وبعدين لما يسخن بحط ازيد من الكمية دى بشوية بحط دقيق ولما يفئفئو كده بحط لبن مع ماية وساعات كريمة
- واسيبه يغلى واحط ملح وفلفل وبعدين بضيف عليه الفراخ بالمشروم دى اللى عملتها وبضيف عليهم المكرونة
- وبيبقى شكلها كده ملغبط شكلها شوية بس والله طعمها جميل جدا
- فيه طرق تانية للتقديم بتخلى الشكل اظرف بس مصورتهاش مبعملهاش كتير
- انك تحطى المكرونة المسلوقة فى الطبق
- وعليه الصوص الأبيض فوقها
- وفوقهم الفراخ بالمشروم
- شكلها أشيك جدا بس هتقلبيهم بردو فالاخر
- وكمان لو فيه فلفل أحمر وأصفر هيبقى شكلها ألطف وأظرف بس بتقلى الفلفل لوحده قلى خفيف
- وتضيفيه فى الصوص
- لأنه لو اتعمل فى البداية مع البصل هيتبهدل او ويطرى اوى واحنا عاوزينه صاحى ومقرمش شوية
- عشان الشكل والطعم
