طريقة عمل الحمة الباردة عرق تريبيانكو
عناصر المحتوى
المقادير:
- عرق تربيانكو
- فصوص توم
- ملح
- فلفل
- حبهان
- بهارات
- ورق لورى
التحضير:
- بتجيبى من عند الجزار عرق تريبيانكو الوزن اللى انتى عاوزاة
- و بعدين بالسكينة تفضلى تعملى فيه فتحات
- و تجيبى فصوص توم و تتبليها بملح و فلفل اسمر بحبهان و بهارات
- و تدخلى فصوص التوم فى العرق بالتدبيلة و تضغطى عليهم كويس
الطبخ: طريقة عمل الحمة الباردة عرق تريبيانكو
- تجيبى معلقة سمنة و تحطيها فى الحلة و تحطى العرق فى الحلة
- تحمرى العرق من كل الجهات
- و بعد ما اتحمر وطى النار حطى ورقتين لورى و غطى الحلة و سيبى العرق ينزل ميته
- و بعدين اكشفى الحلة و زودى ميه تغطى نص العرق
- لما الميه تغلى توطى النار و تغطى الحلة و تسيبيه يستوى و كل شويه ابقى قلبى العرق
و دلوقتى بقى العرق استوى - هاتشيليه من الحلة
- و تسيبيه يبرد و تسيبى الميه اللى فى الحلة تغلى شويه علشان تقل شويه
- بعدين تصفى الميه دى علشان لو كان وقع توم فيه و كمان تشيلى ورق اللورى
- تكون اللحمة بردت تقطعيها شرايح
- اوعى تقطعيها و هى سخنة علشان ماتبوظش و تفرول
- ميه اللحمة بقى و هى بردة كدة تحطى عليها شوية دقيق و تقلبيهم كويس علشان تعملى بيهم الصوص
- ماتحطيش الدقيق و الميه سخنة علشان الدقيق ما يكلكعش
- حطى الصوص بقى على النار يغلى غلوة كدة علشان يتقل و تفضلى تقلبى فيه
- اغرفى بقى فى طبق شرايح لحمة باردة و ضيفى عليها الصوص
